अमर ऊर्जा पुरस्कार २०२३

अमर हिंद मंडळ, दादर या संस्थेतर्फे देण्यात येणाऱ्या ‘अमर ऊर्जा पुरस्कार २०२३’ साठी संपूर्ण महाराष्ट्रातून आलेल्या ७५ अर्जांमधून खालील ४ संस्थांची ‘अमर ऊर्जा पुरस्कार २०२३’ साठी निवड करण्यात आली आहे. अमर ऊर्जा पुरस्काराचे हे तिसरे वर्ष असून एक लाख रुपये रोख , सन्मानचिन्ह आणि मानपत्र असे या पुरस्काराचे स्वरूप आहे. सदर पुरस्काराचे वितरण मंडळाच्या प्रांगणात रविवार दि. ३ मार्च रोजी संध्याकाळी ठीक ६.०० वाजता संमारभ पूर्वक होणार आहे.
पुरस्कार प्राप्त संस्था पुढीलप्रमाणे.
१ . आई डे केअर संस्था , पेण
२. आरंभ सोसायटी फॉर ऑटिझम अँड स्लो लर्नर चिल्ड्रेन , औरंगाबाद.
३. जीवन संवर्धन फाउंडेशन , कल्याण
४. आदिवासी पारधी समाज विकास संस्था, संचलित संकल्प वसतिगृह, राशीन
मंडळाच्या संपूर्ण कार्यकारी समितीतर्फे विजेत्या संस्थांचे अभिनंदन आणि सर्व सहभागी संस्थांचे आभार.
आपले नम्र
संपूर्ण कार्यकारी समिती

अमर हिंद मंडळ थोडक्यात ....

स्वातंत्र्यपूर्व काळात देशभर स्वातंत्र्य चळवळींचे वारे जोरदारपणे वाहत होते. फाळणीनंतरच्या जातीय दंग्यांच्या काळात हिंदू-मुसलमानांचा परस्परांवरील विश्वास उडाला होता. अशा असुरक्षिततेच्या वातावरणात दादर विभागातील काही तरुणांनी एकत्र येऊन दादर नागरिक दलाची स्थापना केली आणि गस्त, पहारे सुरू केले. यातूनच हुतूतू प्रेमी राजा शेट्ये आणि नारायण पडते यांची व प्रकाशभाईंची ओळख झाली. गस्त आणि पहा-यांच्या निमित्ताने हुतूतूचे सामने भरवण्यापासून सुरू झालेल्या कार्यातून मग चर्चासत्रे व व्याख्यानमाला आयोजित करण्याची कल्पना पुढे आली. या अनुषंगाने बॉम्बे टाईपरायटींग इन्स्टिट्यूटमध्ये सर्व उत्साही कार्यकर्त्यांची सभा झाली. प्रकाशभाई मोहाडीकरांनी ‘अमर हिंद मंडळा’ची घटना, नियम यांचा आराखडा आपल्या सहका-यांसमोर मांडला. तो एकमताने मंजूर झाला आणि  २६ जानेवारी १९४७ रोजी ‘अमर हिंद मंडळा’ची स्थापना झाली. मंडळाचा पहिला उपक्रम म्हणून ‘वसंत व्याख्यानमाला’ आयोजित करण्याचे ठरविले. मंडळाची स्थापना झाल्यानंतर मंडळाला स्वतःची जागा मिळावी यासाठी इंजिनीयर नानासाहेब मोडक, काकासाहेब गाडगीळ, डॉ.राऊत आणि इतरांनी प्रयत्न केले आणि आज ज्या जागेत मंडळाची वास्तू उभी आहे ती जागा मंडळाला मिळाली.

सर्व अधिकार राखीव © २०२३ - अमर हिंद मंडळ

loading